Notifiki

Aktar minn 60% tal-adulti f’Malta huma mlaqqma b’minn tal-inqas l-ewwel doża

Aktar minn sittin fil-mija tal-adulti f’Malta huma mlaqqma b’minn tal-inqas l-ewwel doża tal-vaċċin kontra l-Coronavirus.

Ma’ ONE News, fil-jum li ġew rilaxxati numru ta’ miżuri fil-pjan meqjus tal-Gvern, is-Supretendent tas-Saħħa Pubblika l-Professur Charmaine Gauci qalet li numru sostanzjali mill-persuni li tlaqqmu f’pajjiżna, ħadu ż-żewġ dożi tal-vaċċin.

Qalet li hekk kif illum komplew jonqsu l-miżuri, huwa kruċjali li jibqgħu jiġu segwiti l-mezzi ta’ mitigazzjoni.

Filwaqt li appellat biex kull min hu eliġibbli, jirreġistra biex jitlaqqam, saħqet fuq l-importanza li meta nattendu fil-postijiet li qed jinfetħu, inżommu d-distanza, nilbsu l-maskri u naħslu idejna ta’ spiss.

“B’dawn l-affarijiet kollha flimkien, nibqgħu mexjin, inżommu n-numri baxxi u jkollna kontroll tas-sitwazzjoni biex nibqgħu għaddejjin mill-pandemija bl-inqas impatt possibbli”, temmet il-Prof. Gauci.

Mit-Tlieta jibdew jitlaqqmu tat-30+

Minn nhar it-Tlieta li ġej dawk li jgħoddu tletin sena jew aktar se jkunu jistgħu jirreġistraw biex jitlaqqmu kontra l-Covid-19.

Qal dan f’intervista mxandra fuq ONE, id-Deputat Prim Ministru u Ministru għas-Saħħa Chris Fearne.

Il-ġimgħa l-oħra fetħet ir-reġistrazzjoni għat-tlaqqim ta’ dawk li jgħoddu minn erbgħin sena ’l quddiem u fil-bulletin mediku tal-Ġimgħa, is-Supretendent tas-Saħħa Pubblika, il-Professur Charmaine Gauci spjegat kif diġà tlaqqmu 42% ta’ dawk li għandhom erbgħin u disgħa u erbgħin sena.

Il-Parlament Ewropew se jivvota fuq il-passaport tal-vaċċin

Nhar l-Erbgħa li ġej, il-Parlament Ewropew se jivvota biex jiġi approvat il-passaport tal-vaċċin, magħruf bħala d-Digital Green Certificate.

F’konferenza tal-aħbarijiet fil-Parlament Ewropew fi Brussell, jumejn qabel il-vot, il-Membru Parlamentari Ewropew Sophie In‘t Veld mill-Kumitat LIBE qalet li huwa dritt fundamentali tal-Unjoni Ewropea li ċ-ċittadini Ewropej jivvjaġġjaw b’mod sigur.Aqra aktar

Il-benefiċċji tal-vaċċin tal-Johnson & Johnson jiżbqu l-effetti rari li jista’ jkollu

L-Aġenzija Ewropea tal-Mediċini, l-EMA qalet li qed tikkunsidra li l-każijiet rari rrappurtati ta’ trombożi jistgħu jkun u meqjusa bħala effetti tal-vaċċin għall-Covid-19 tal-Johnson and Johnson.

F’konferenza tal-aħbarijiet, it-Tlieta waranofsinhar, il-Kap Eżekuttiv Emer Cooke saħqet fuq l-importanza u l-benefiċċji tal-vaċċin, li huma aħjar milli wieħed jispiċċa jitlef ħajtu.

L-aġenzija tal-Unjoni Ewropea qalet li ħarġet b’din il-konklużjoni wara tmien każijiet irrappurtati fl-Istati Uniti.

Aqra aktar

It-tieni doża tal-AstraZeneca mhux qed tħalli effett stramb

“It-tieni doża tal-vaċċin tal-AstraZeneca mhux qed ikollha l-effett stramb rari ta’ trombożi.”

Hekk stqarr uffiċjal mit-taqsima tal-mard infettiv, Dr Charles Mallia Azzopardi, li f’intervent waqt xandira politika l-Ħadd filgħodu serraħ moħħ dawk li għad iridu jieħdu t-tieni doża tal-vaċċin tal-AstraZeneca.Aqra aktar

Send this to a friend