Notifiki

Is-Senat Amerikan ma jsibx ħati lil Trump b’rabta mal-irvellijiet fil-Capitol Hill

Is-Senat Amerikan ma sabx lil Donald Trump ħati li inċita l-vjolenza u instiga l-irvellijiet li seħħew lejn tmiem it-terminu Presidenzjali tiegħu, fil-Capitol Hill. Waqt is-smigħ tal-ġuri fis-Senat, wara li fil-Kamra tar-Rappreżentanti, Trump ġie impeached għat-tieni darba, is-Senat reġa’ ħelisha lil Trump.

Dik deskritta bħala rebħa għal Trump waslet wara li numru sew ta’ Repubblikani ma vvutawx biex Trump jinstab ħati. Fil-fatt kien hemm bżonn 17-il Senatur Repubblikan li jivvutaw kontra Trump. Il-maġġoranza tas-Senaturi sabu lill-eks President Amerikan ħati iżda biex xi ħadd jinstab ħati kien hemm bżonn żewġ terzi tas-Senaturi li jivvutaw favur il-ħtija ta’ Trump. Fil-fatt kienu 57 Senatur li sabu lil Trump ħati kontra 43 Senatur li sabuh mhux ħati.

B’dan l-iżvilupp l-eks President Amerikan jista’ jerġa’ jikkontesta l-elezzjoni Presidenzjali tal-2024. Dan kien l-iktar ġuri ta’ impeachement qasir fl-istorja politika Amerikana hekk kif ġie konkluż f’ħamest ijiem.

Fis-6 ta’ Jannar, waqt attività politika barra l-White House f’Washington DC, Trump u wliedu fost oħrajn appellaw lill-folla quddiemhom biex ma jċedux u ma jaċċettawx ir-riżultat tal-elezzjoni Presidenzjali mirbuħa minn Joe Biden. Trump kien talab lin-nies biex jiġġieldu għall-kawża tiegħu. Trump baqa’ sal-aħħar ma jikkonċedix u anki ħadha kontra Mike Pence, dak iż-żmien il-Viċi President tal-Istati Uniti.

Fil-ħin li l-Kungress Amerikan kien qed jiċċertifika r-riżultat tal-elezzjoni, numru ta’ dimostranti favur Trump taw is-salt u daħlu fil-Capitol Hill, il-binja fejn hemm il-qalba tal-Gvern Amerikan. F’dawn l-irvellijiet mietu ħames persuni.

Trump jiġi impeached għat-tieni darba mill-Kungress Amerikan

Il-President Amerikan Donald Trump ġie impeached mill-Kamra tar-Rappreżentanti.

Din hija l-ewwel darba fl-istorja politika Amerikana li President sofra żewġ impeachments f’terminu wieħed.

Fil-Kungress Amerikan kien hemm 232 vot favur biex Trump jitneħħa mill-poter qabel l-20 ta’ Jannar li ġej.

Kien hemm ukoll 197 vot kontra.

Kien hemm għaxar deputati Repubblikani mill-Partit ta’ Trump li vvutaw biex Trump jitneħħa.

Dan għall-kuntrarju tal-ewwel impeachment meta l-ebda deputat Repubblikan ma kien vvota kontra Trump iżda issa kien hemm numru sinjifikanti ta’ Repubblikani li qablu ma’ dak li riedu d-Demokratiċi.

Issa jmiss li s-Senat jiddeċiedi jekk Trump għandux jitneħħa minn President.

Fis-Senat, ir-Repubblikani għad għandhom maġġoranza.

Trump qed jiġi akkużat li instiga l-attakki vjolenti tal-ġimgħa l-oħra fil-Capitol Hill f’Washington DC.

Il-ġuri ta’ Trump quddiem is-Senat biex jitneħħa mistenni jintemm wara li Joe Biden jilħaq President iżda vot addizzjonali jista’ jimpedixxi lil Trump milli jerġa’ joħroġ għall-elezzjoni Presidenzjali.

Trump kien wera l-intenzjoni li erba’ snin oħra jerġa’ jagħmel attentat biex jikseb l-ogħla kariga fil-White House.

Send this to a friend