ezekuttiv – One News

Notifiki

BREAKING: Delia jitlef vot ta’ fiduċja fil-laqgħa tal-eżekuttiv…47 membru kontrih u 36 membru favurih

01:55: Joħroġ Adrian Delia u jintlaqa’ minn ċapċip mill-partitarji leali lejh, li nġabru barra d-Dar Ċentrali. Jgħid li l-vot ta’ sfiduċja fih kien wieħed dikjaratorju.

01:53: Joħroġ is-Segretarju Ġenerali Nazzjonalista Francis Zammit Dimech u l-President tal-Eżekuttiv tal-PN Alex Perici Calascione. Dehru skomdi u ma wieġbux jekk urewx fiduċja fil-Kap Adrian Delia.

01:50: Stqarrija maħruġa mill-Partit Nazzjonalista tikkonferma li Adrian Delia ġie sfiduċjat fil-laqgħa tal-eżekuttiv. L-istqarrija tal-PN tikkonferma n-numri li żvela ONE News jiġifieri li 47 membru tal-eżekuttiv qalu li m’għandhomx fiduċja fil-Kap Adrian Delia, 36 membru qalu li għandhom fiduċja filwaqt li membru ieħor astjena. Fl-istess laqgħa ta’ kważi seba’ sigħat ġew approvati l-ħatriet ta’ kummissjonijiet fosthom waħda għall-etika u d-dixxiplina.

01:44: Jibdew ħerġin membri tal-eżekuttiv mid-Dar Ċentrali. Adrian Delia ġie sfiduċjat it-tieni darba fl-istrutturi tal-Partit Nazzjonalista.

01:39: Delia jitlef vot ta’ fiduċja fil-laqgħa tal-eżekuttiv tal-PN. Sorsi qalulna li 47 membru tal-eżekuttiv sfiduċjawh u 36 membru wrew fiduċja fil-Kap.

01:09: Sorsi fil-laqgħa li tkellmu ma’ ONE News qalu li bħalissa qed jittieħed il-vot ta’ sfiduċja mill-membri tal-eżekuttiv tal-PN fil-konfront tal-Kap Adrian Delia.

01:05: Għajjat kbir jinstema’ jidwi mil-laqgħa tal-eżekuttiv tal-Partit Nazzjonalista. Il-ġurnalisti jinnutaw dan l-iżvilupp fis-sigħat bikrin ta’ filgħodu.

00:50: Adrian Delia jgħid li l-vot ta’ sfiduċja fih fl-eżekuttiv m’għandux jittieħed illum għax ma kienx imniżżel fl-aġenda tal-laqgħa. Chris Said jinsisti li l-vot ta’ sfiduċja għandu jittieħed illejla.

00:10: Sorsi fil-laqgħa tal-eżekuttiv għaddejja diskussjoni mqanqla u sħuna fost il-membri tal-eżekuttiv. Dawn is-sorsi qalulna li Lawrence Gonzi qed jipproponi tellieqa mat-tesserati bejn Adrian Delia u Therese Comodini Cachia. Dawn is-sorsi qalulna li imbagħad hekk tkun aktar ċara li fil-Partit Nazzjonalista min hu l-aqwa jħawwel.

23:45: Il-laqgħa tal-eżekuttiv issa dieħla fil-ħames siegħa dalwaqt. Chris Said li ressaq il-mozzjoni ta’ sfiduċja f’Delia l-ġimgħa li għaddiet fil-grupp parlamentari qed jgħid li għandu jittieħed vot ta’ sfiduċja fl-eżekuttiv tal-PN.

22:37: Tiżdied il-pressjoni biex Adrian Delia jwarrab minn Kap. Fil-laqgħa taħraq tal-eżekuttiv tal-PN mistenni vot ta’ sfiduċja fil-Kap fil-ħin li ġej. Sorsi jgħidu li Lawrence Gonzi qed jimbotta vot fost it-tesserati. Hemm min fil-laqgħa tal-eżekuttiv qed isemmi wkoll vot ta’ fiduċja fil-Kunsill Ġenerali. L-istatut jgħid li jridu jgħaddu sentejn mindu titressaq mozzjoni simili ta’ fiduċja f’Kunsill Ġenerali fil-konfront ta’ Kap u Viċi-Kap. Analisti politiċi qed jgħidu li fid-dawl li l-istatut ġdid għadu kif ġie approvat ftit tal-jiem ilu, dan l-artiklu dwar mozzjoni ta’ sfiduċja jista’ ma jiġix applikat b’mod retro-attiv.

21:11: Hekk kif tressqet il-mozzjoni min-naħa tal-fazzjoni ta’ Simon Busuttil biex jisfiduċjaw lil Adrian Delia qamet rabja kbira u kien hemm furur fost uħud il-membri tal-eżekuttiv tal-PN. Minnufih, tal-fazzjoni ta’ Delia ressqu vot ta’ fiduċja fil-Kap.

21:09: F’laqgħa tal-eżekuttiv tal-Partit Nazzjonalista tressqet mozzjoni ta’ sfiduċja f’Adrian Delia. Din hija t-tieni mozzjoni kontra l-Kap Nazzjonalista wara li l-ġimgħa l-oħra tressqet waħda fil-grupp parlamentari. Il-ġimgħa l-oħra, Delia tilef mozzjoni ta’ sfiduċja hekk kif 19-il deputat sfiduċjawh. Is-sorsi tagħna fil-laqgħa tal-eżekuttiv qalulna li t-tabib Dr. Michael Asciak, bħala membru tal-eżekuttiv ressaq din il-mozzjoni. Asciak huwa eks kandidat tal-PN u eks deputat Nazzjonalista li kien ħa siġġu parlamentari meta Tonio Borg laħaq Kummissarju Ewropew fl-2012. Asciak jidher li issa jinsab mal-fazzjoni favur Therese Comodini Cachia. Nifhmu li l-fazzjoni ta’ Simon Busuttil qed jagħmlu tentattiv ieħor li jisfiduċjaw lill-Kap Nazzjonalista, din id-darba f’organu ieħor tal-partit tal-maduma.

 

20:20: Diversi partitarji Nazzjonalisti jinsabu barra d-Dar Ċentrali u bdew jiffirmaw fuq karti. Mhux eskluża petizzjoni spontanja fejn dawk favur Adrian Delia qed jitolbu għat-tkeċċija tad-deputati Nazzjonalisti li sfiduċjaw lill-Kap Nazzjonalista l-ġimgħa li għaddiet.

19:30: L-eks Prim Ministru u Kap Nazzjonalista Lawrence Gonzi jasal għal-laqgħa tal-eżekuttiv.

19:20: Spikkat it-tensjoni hekk kif waslet Therese Comodini Cachia fid-Dar Ċentrali.

 

18:54: Qabel ma daħal għall-Eżekuttiv id-Deputat Nazzjonalista li vvota favur Delia, qal li jittama li wara d-deċiżjoni tal-President jingħalaq dan il-każ. Sostna li jekk dawn id-deputati ma joqogħdux għal din id-deċiżjoni, dawn għandhom jaffaċċjaw il-konsegwenzi liema konsegwenzi għandhom ikunu diskussi internament.

18:52: Il-membru tal-Eżekuttiv mill-fazzjoni ta’ Adrian Delia, issemmi l-fatt li meta lura fl-2012 l-eks Deputat Franco Debono kien sfiduċja t-tmexxija tal-Eks Kap Nazzjonalista Lawrence Gonzi, kienu ttieħdu passi kontrih u għalhekk issa qed jistenna li jsir l-istess.

18:50: Hu u dieħel id-Deputat Nazzjonalista Hermann Schiavone qal li għandu jiskatta proċess biex jinħatar Kap ġdid tal-Partit Nazzjonalista.

18:45: Jibdew deħlin id-deputati u membri tal-Eżekuttiv tal-Partit Nazzjonalista fosthom l-eks Kap tal-Partit Nazzjonalista Lawrence Gonzi. Fil-laqgħa tal-eżekuttiv hemm diskussjoni taħraq dwar il-kriżi fil-bankijiet tal-Oppożizzjoni.

Beda jitlaqqa’ l-eżekuttiv tal-Partit Nazzjonalista fost il-ġlied u l-inkwiet intern li għaddej fil-partit imexxi minn Adrian Delia. 

F’eżekuttiv ta’ madwar tmenin membru, presedut minn Alex Perici Calscione għaddejjin ħafna battibekki dwar id-deċiżjonijiet li għandu jieħu l-Kap u dawk id-deċiżjonijiet li għandhom jittieħdu fil-konfront tal-Kap.

Jitlaqqa’ l-eżekuttiv tal-PL biex jiddiskuti bidla fl-istatut

Fiċ-Ċentru Laburista ta’ Marsaxlokk qed jitlaqqa’ l-eżekuttiv tal-Partit Laburista fejn qed tiġi diskussa l-possibilità ta’ bidla fl-istatut biex il-kariga ta’ Deputat Mexxej għall-Affarijiet tal-Partit timtela’ minn persuna li ma tkunx Membru Parlamentari ħalli tkun iffukata biss fuq il-ħidma tal-Partit. Aqra aktar

Jiġi deċiż liema distretti se jċedu l-kandidati li ġew eletti fuq żewġ distretti

L-Eżekuttiv tal-Partit Laburista ddeċieda liema distretti se jkunu qed iċedu l-kandidati tal-Partit Laburista li ġew eletti fuq żewġ distretti.

B’kollox hemm seba’ kandidati li ġew eletti fuq żewġ distretti li jinkludu lill-Prim Ministru Joseph Muscat li ġie elett fuq it-tieni u l-ħames distrett, Helena Dalli li ġiet eletta fuq it-tieni u t-tielet distrett, Chris Fearne li ġie elett fuq it-tielet u r-raba’ distrett, Silvio Schembri li ġie elett fuq is-sitt u s-seba’ distrett, Edward Scicluna li ġie elett fuq is-seba’ u t-tmien distrett, Evarist Bartolo fuq l-għaxar u t-tnax-il distrett u Michael Falzon fuq id-disa’ u l-għaxar distrett.

Aqra aktar

Send this to a friend