Notifiki

12,000 familja f’Għawdex se jirċievu water saving kits biex jikkonservaw l-ilma

Tnax-il elf familja f’Għawdex se jirċievu water saving kits matul Ġunju u Lulju biex jikkonservaw l-ilma bħala parti mill-kampanja nazzjonali, L-Ilma – Ibda Minnek.

Waqt żjara fil-gżira Għawdxija l-Ministru Miriam Dalli, s-Segretarju Parlamentari Stefan Zrinzo Azzopardi u l-Ministru Clint Camilleri ħabbru li ta’ kull ġimgħa, mobile unit se jdur kull lokalità biex jitqassmu dawn il-kits.

Kull dar se tirċievi wkoll voucher u pakkett li se jissarraf f’għodda għall-iffrankar tal-ilma.

Il-Ministru Dalli stqarret li l-ħsieb wara dawn il-kits huma bidliet sempliċi madwar id-dar biex jonqos il-konsum tal-ilma.

“Tnax-il elf dar li permezz ta’ dan il-kit tal-ilma li ser inkunu qegħdin inqassmu jkunu jistgħu wkoll jiffrankaw l-użu tal-ilma. Wara kollox f’pajjiżna l-ilma huwa riżorsa mill-aktar importanti u allura rridu naċċertaw ruħna li din ir-riżorsa nieħdu ħsiebha u fl-istess ħin ikun ta’ benefiċċju għall-familja għaliex il-familji ser ikunu qegħdin jiffrankaw ukoll finanzjarjament għaliex ikunu qegħdin jikkonsmaw inqas ilma.”

Is-Segretarju Parlamentari Stefan Zrinzo Azzopardi spjega li dan il-proġett qed isir permezz ta’ investiment ta’ iktar minn erbgħa u għoxrin miljun ewro li l-maġġoranza kbira tagħhom ġejjin minn fondi Ewropej.

“Qegħdin ninvestu fondi tal-Unjoni Ewropea f’madwar wieħed u għoxrin miljun ewro sabiex nedukaw u nkomplu noħolqu għarfien kemm hu importanti li nieħdu ħsieb ir-riżorsa tal-ilma.”

Il-Ministru għal Għawdex sostna fuq l-importanza li minn età żgħira nrawmu t-tfal biex jibżgħu għall-ilma u ma jaħlux.

“Illum il-ġurnata sa xahrejn oħra ser inkunu qegħdin induru l-lokalitajiet kollha ġewwa Għawdex sabiex il-pubbliku tagħna jkun jista’ wkoll jibbenefika minn din l-inizzjattiva tant importanti għall-gżira tagħna.”

 

Il-BirdLife tressaq protest biex twaqqaf il-kaċċa minkejja r-rakkomandazzjoni tal-kumitat Ornis

BirdLife Malta ressqet protest ġudizzjarju fil-Qorti kontra l-Ministru għall-Ambjent, il-Ministru għal Għawdex, u l-Kap tat-Taqsima tar-Regolamentazzjoni għall-Għasafar Selvaġġi talli qed jippjanaw li jiftħu l-istaġun tal-kaċċa fir-rebbiegħa.

B’reazzjoni għal din l-azzjoni legali biex l-istaġun tal-kaċċa ma jiftaħx, il-Ministru għal Għawdex Clint Camilleri fakkar li hekk kif propost mill-kumitat Ornis, l-istaġun tal-kaċċa fir-rebbiegħa jista’ jiftaħ bejn l-għaxra u t-tletin ta’ April.

Fakkar ukoll kif ftit inqas minn sena ilu, l-istess għaqda mhux governattiva fetħet kawża l-Qorti kontra l-Gvern dwar il-ħruġ tal-liċenzji lill-kaċċaturi għall-istess staġun.

 

 

Għawdex terġa’ tikklassifika mal-aqwa 100 destinazzjoni turistika dinjija

Għal darb’oħra, il-gżira ta’ tliet għoljiet ikklassifikat mal-aqwa mitt destinazzjoni sostenibbli turistika fid-dinja. Dan wara li d-Direttorat tat-Turiżmu u l-Iżvilupp Ekonomiku fi ħdan il-Ministeru għal Għawdex tefa’ n-nomina għal dan il-premju.Aqra aktar

Il-Kumitat Ornis jivvota favur id-deroga tal-insib għall-għasafar tal-għana għal skop ta’ riċerka

Il-Kumitat Ornis ivvota favur id-deroga tal-insib għal seba’ speċi ta’ għasafar tal-għana għal skop ta’ riċerka.

Dan tħabbar permezz ta’ ittra mill-Kumitat Ornis li nbagħtet lill-Ministru Clint Camilleri, fejn tħabbar li dan il-kumitat ivvota favur id-deroga għall-insib fuq seba’ speċi ta’ għasafar tal-għana għall-iskop ta’ riċerka.

Aqra aktar

Diskussi pjanijiet għal servizz ta’ ferries bejn Għawdex u diversi bliet Maltin inkluż il-Belt Valletta

Għawdex se jkollu servizz ta’ trasport ġdid fuq il-baħar, hekk kif tħabbar li lanċa se tibda taqsam mill-gżira tat-tliett għoljiet lejn diversi postijiet f’Malta fosthom, il-Belt Valletta.Aqra aktar

Send this to a friend