‘In-Narċis’ f’ San Vinċenz de Paule se jibda jagħti servizz mill-ħarifa
Tlesta x-xogħol fuq 75% tal-binja bl-isem Narċis li se tospita adulti iżgħar fl-età, li minħabba xi inċident jew ċirkustanza oħra, għandhom dipendenza għolja ħafna. Dan il-proġett sewa qrib iż-€2 miljun.
Waqt żjara fuq il-post li għamlu l-Ministru Michael Falzon u s-Segretarju Parlamentari Silvio Parnis, kien spjegat li l-binja se tospita mas-sittax-il persuna bejn is-16 u s-60 sena, li se jkunu kkwalifikaw ukoll għal programm ta’ riabilitazzjoni u program soċjali. Dan se jkun offrut minn professjonisti grazzi għal ftehim li r-residenza għamlet mal-Aġenzija Sapport. Hawnhekk se jkunu offrut ukoll servizz ta’ respite u ta’ terapija tal-familja.
Il-Kap Eżekuttiv tar-residenza San Vinċenz de Paule Josianne Cutajar qalet li l-pjan hu li l-binja tinfetaħ u tibda tintuża mill-ħarifa.
Kumpanija Torka f’kontroversja oħra dwar ħlasijiet
Lukanda f’Wied il-Għajn ressqet protest ġudizzjarju kontra l-kumpanija Torka tal-kostruzzjoni TACA wara li din ma ħalsitx għall-ikel u l-akkomodazzjoni li offriet lill-ħaddiema. Qed ikun irrappurtat li l-ispejjeż jaqbżu l-kwart ta’ miljun ewro.
Esperiment b’tipi differenti tal-għenba tal-mejda u bnina Maltija
Grupp ta’ bdiewa Maltin għaddejin bi proġett esperimentali biex jaraw x’riżultati differenti wieħed ikollu b’għeneb tal-mejda differenti. Il-proġett ra t-tħawwil ta’ dwieli f’tomna art li fiha hemm diversi tipi ta’ għeneb, fosthom anke mingħajr żerriegħa. Il-bdiewa li qed jipparteċipaw fir-riċerka kollha jagħmlu parti mis-Soċjetà Vitimalta. Dawn esperimentaw ukoll bi strutturi differenti ta’ tħawwil ta’ dwieli, fosthom anke sistemi internazzjonali.
Tiżżewweġ il-Prinċipessa Beatrice
Il-Prinċipessa Beatrice tal-Ingilterra żżewġet lill-imprenditur Taljan Edoardo Mapelli Mozzi f’ċerimonja privata f’Windsor, ir-Renju Unit.Aqra aktar
Il-PM Robert Abela f’summit dwar il-baġit Ewropew għas-seba’ snin li ġejjin
Illum il-Mexxejja Ewropej qed jiltqagħu għall-ewwel summit li mhux se jsir b’mod virtwali mill-pandemija COVID-19.Aqra aktar
BIL-FILMAT: Isma’ l-kummenti tat-turisti fil-jum li fih l-ajruport fetaħ għal destinazzjonijiet ġodda
Mill-Erbgħa, l-Ajruport Internazzjonali ta’ Malta fetaħ għal 28 destinazzjoni oħra kif tħabbar ġimgħat ilu mill-Gvern. B’hekk issa Malta fetħet it-triq mill-ġdid għal pajjiżi bħall-Olanda, il-Kanada, it-Turkija u New Zealand.
BIL-FILMAT: Espert tal-ivjaġġar jgħid li Malta hi destinazzjoni sigura
Fuq il-midja Irlandiża, Malta qed tissemma’ bħala l-isbaħ u l-aktar destinazzjoni sigura fl-Ewropa, li bil-mod qed tiftaħ il-fruntieri tagħha għall-ivvjaġġar.
Din id-darba kien l-espert tal-ivvjaġġar Eoghan Corry, li fuq il-programm Ireland AM tkellem dwar il-vjaġġ tiegħu lejn Malta l-ġimgħa l-oħra.
“Malta is quite a safe desintation, and very picky about who they let in. They let the Irish in last Wednesday, and they are still considering whether to let the British in. They have 0 cases for quite a while now and they are watching what happens when you open your borders.”
BIL-FILMAT: Il-Kunsill Nazzjonali taż-Żgħażagħ jippreżenta l-pjan tiegħu għas-sena 2020/2021
Il-Kunsill Nazzjonali taż-Żgħażagħ ippreżenta il-pjan ta’ ħidma tiegħu sas-sena d-dieħla. Dan fih 38 proposta li jiffokaw fost l-oħrajn fuq aktar opportunitajiet għaż-żgħażagħ fosthom li jibqa’ jiġi organizzat il-Parlament Nazzjonali taż-Żgħażagħ u jiżdiedu l-kollaborazzjonijiet ma’ Aġenzija Żgħażagħ.
Il-President tal-Kunsill Chiara Vassallo spjegat kif din is-sena kienet waħda impenjattiva ferm, b’diversi ħidmiet ma’ setturi differenti fosthom anki fi pjattaformi Ewropej.
BIL-FILMAT: Lest aktar minn 70% tal-proġett tal-Junction tal-Marsa
Sax-xahar id-dieħel se jiftħu tliet flyovers oħra fil-proġett tal-Junction tal-Marsa. F’konferenza tal-aħbarijiet mill-Ministru għall-Infrastruttura Ian Borg u s-Segretarju Parlamentari għall-Fondi Ewropej Stefan Zrinzo Azzopardi intqal li 70% ta’ dan il-proġett issa huwa lest.
Il-Ministru Ian Borg spjega kif l-aħħar erba’ flyovers waslu għall-asfalt u l-aħħar xogħlijiet, u bħalissa għaddej xogħol fuq l-aħħar erba’ rampi li se jgħaqqdu dawn il-flyovers mat-toroq tal-madwar.
“Saru xogħlijiet f’żoni li issa se jkunu aċċessibbli għall-poplu fi ġranet jew ġimgħat. Se jkun hemm rotot differenti għax ix-xogħol jibda jippostja ruħu, però fi ftit ġimgħat se jkun qed jitgawda minn kulħadd.”