Notifiki

Il-Pulizija tarresta suspettat fl-omiċidju tal-Marsa

Ftit tas-sigħat wara li seħħ l-ewwel omiċidju tas-sena, l-Pulizija, fid-Depot arrestat raġel ta’ 25 sena mill-Għana b’rabta mad-delitt tal-Ħamis filgħaxija.

Il-każ seħħ fi Triq it-Tiġrija, il-Marsa, meta qam argument bejn żewġt irġiel fejn wieħed minnhom spiċċa ferut b’daqqiet ta’ sikkina.

Il-vittma, li huwa Ghaniż ukoll u kellu 23 sena, miet ftit tal-ħin wara fl-isptar wara li anki ngħata s-CPR fuq ix-xena tad-delitt.

Minn informazzjoni miksuba minn fuq il-post tar-reat, ONE News jista’ jikkonferma li r-raġel inqatel permezz ta’ daqqiet ta’ sikkina.

Fi stqarrija dalgħodu, il-pulizija kkonfermat il-każ irrappurtat l-ewwel minn one.com.mt u qalet li l-vittma kellu tliet daqqiet ta’ sikkina f’sidru.

Intant l-allegat aggressur ġie arrestat għall-ħabta tas-siegħa u nofs ta’ filgħodu wara li l-pulizija ċċirkondaw dar fi Triq Azzopardi, il-Marsa.

Kif il-pulizija daħlu fid-dar, raw persuna tipprova taħrab għal fuq il-bejt u l-pulizija arrestatu minnufih.

Minn aktar tfittxijiet instabet ukoll is-sikkina li allegatament intużat fil-qtil.

Is-sikkina instabet qalb is-siġar fi Triq il-Jum.

Matul il-lejl, ONE News irrapporta li xhieda li raw il-każ identifikaw lill-aggressur u immedjatament skattat tfittxija mill-Pulizija tar-Rapid Intervention Unit, liema tfittxija ħalliet il-frott ftit tal-ħin wara.

Fuq ix-xena tar-reat kien hemm l-investigaturi mill-Iskwadra tar-Reati Maġġuri u tal-Omiċidji mmexxija mill-Assistent Kummissarju Sandro Gatt u s-Supretendent Keith Arnaud flimkien mal-Ispetturi Wayne Camilleri u Kurt Zahra.

Huma bdew ikellmu lix-xhieda kif ukoll permezz tal-assistenza tal-esperti forensiċi ddokumentaw ix-xena tar-reat.

F’filmati miġbuda minn ONE News, l-esperti forensiċi dehru wkoll jelevaw kampjuni minnn għadira demm li tħalliet mill-vittma hekk kif huwa instab mixħut fl-art biswit stalla li tinsab fl-istess triq.

Dwar dan il-każ infetħet inkjesta Maġisterjali mmexxija mill-Maġistrat Gabriella Vella li ħatret diversi esperti biex jassistuha.

AQRA WKOLL

BIL-FILMAT: Omiċidju fil-Marsa – Il-Pulizija bi tfittxija għall-aggressur

Ta’ QabelLi Jmiss

Leave a Reply

Your email address will not be published. Required fields are marked *

Send this to a friend