Jinżamm arrestat wara li ġie mixli li aggredixxa anzjan u seraqlu l-flus

Raġel ta’ 54 sena baqa’ jinżamm arrestat wara li tressaq il-Qorti b’rabta ma’ aggressjoni u serqa fuq anzjan f’Santa Venera.

Il-każ seħħ fis-seba’ ta’ Mejju li għadda, għall-ħabta tal-11:30 ta’ filgħaxija, meta l-anzjan ta’ 57 sena nstab mixħut mal-art, b’feriti f’rasu, f’Misraħ il-Barrieri, Santa Venera.

Minn stħarriġ tal-Pulizija rriżulta li xi ħadd ħebb għall-anzjan waqt li kien miexi.

L-aggressur waqqgħu mal-art u seraqlu l-kartiera li kien fiha xi flus.

L-akkużat ġie arrestat mill-Pulizija tal-Iskwadra tar-Reati Maġġuri u l-Pulizija mid-distrett tal-Ħamrun, wara li l-pulizija qalet li ġie identifikat permezz ta’ diversi investigazzjonijiet u analiżi minn kameras tas-sigurtà.

L-imputat wieġeb mhux ħati għall-akkużi miġjuba kontrih.

Il-prosekuzzjoni kienet immexxija mill-Ispetturi Lydon Zammit, Stephen Gulia u Roderick Attard.

Ta’ QabelLi Jmiss

Leave a Reply

Your email address will not be published. Required fields are marked *

Send this to a friend