Imut il-ġurnalist veteran Felix Agius

Il-ġurnalist veteran u eks Editur, Felix Agius miet fl-età ta’ 73 sena.

Feliċ, kif bosta kienu jsejħulu kien kiseb diploma fil-ġurnalizmu mill-International Institute of Journalism ta’ Berlin.

Agius beda l-karriera fil-ġurnaliżmu madwar 50 sena ilu, meta ngħaqad mal-ġurnal tal-Partit Laburista ‘Iż-Żmien’ li kien jinħadem u jkun stampat fil-Freedom Press.

Wara huwa ingħaqad mal-Union Press bħala sub-editor mal-ġurnal bl-Ingliż ‘Malta News’.

Felix Agius għamel xi żmien fid-Dipartiment tal-Isport qabel ma’ fl-1981 inħatar Editur tal-ġurnal ‘L-Orizzont’.

Dam f’din il-kariga aktar minn 11-il sena, għax fis-sena 1993 huwa ingħaqad mal-gazzetta ‘KullĦadd’ bħala Editur Eżekuttiv, liema kariga dam jokkupaha sakemm irtira mix-xogħol.

Tul is-snin Felix Agius ta kontribut qawwi fil-ġurnaliżmu u anki bl-analiżi retta tiegħu, wassal ħsibijietu fi programmi differenti fuq ir-radju u t-televiżjoni.

Feliċ kien anki jikteb blogs fuq one.com.mt.

Intant il-Partit Laburista fi stqarrija sellem lill-eks ġurnalista u editur awtorevoli Felix Agius.

Il-Partit Laburista qal li jirrikonoxxi l-ħidma sfieqa ta’ Felix kemm fil-qasam ġurnalistiku u anke sabiex isawwar il-prinċipji soċjalisti b’saħħithom tal-Partit.

Il-Partit Laburista bagħat il-kondoljanzi sinċiera lill-qraba u dawk kollha qrib Felix.

Il-Prim Ministru Robert Abela, permezz ta’ Twitter sellem il-memorja ta’ Feliċ, li sejjaħlu bħala veteran li qatt ma beża’ mill-bidla.

ONE News jagħti l-kondoljanzi lill-familja tiegħu u jrodd ħajr lil Feliċ, li bil-pariri u t-tagħlim siewi tiegħu, rawwem bosta ġurnalisti.

Ta’ QabelLi Jmiss

2 Comments

  1. Aħbar kerha tassew. Kondoljanzi lil familja. Kien fih mitt gost tisimgħu jitkellem dwar il-PL. Strieħ fil-paċi Feliċ.

Leave a Reply

Your email address will not be published. Required fields are marked *

Send this to a friend