Notifiki

Tliet binjiet abbandunati se jirriġeneraw ruħhom għal skop soċjali

Tliet binjiet li kienu fi stat t’abbandun ser jieħdu nifs ġdid għal kollox minn tliet kumpaniji li rebħu kompetizzjoni internazzjonali ta’ disinn biex jirriġeneraw dawn il-binjiet u joħolqu spazju ta’ housing speċjalizzat.

Id f’id mal-Kamra tal-Periti, il-Ministeru għall-Akkomodazzjoni Soċjali ħabbar ir-rebbieħa ta’ din it-tieni kompetizzjoni internazzjonali li permezz tagħhom ħa jgħinu komunitajiet, fosthom vulnerabbli, jsibu ħajt t’appoġġ.

‘Y Communal House’ huwa l-proġett ta’ YMCA Malta li b’investiment ta’ tliet mija u ħamsin elf ewro, il-kumpanija XYZ Architecture and Design ser tibni spazju ta’ rijabilitazzjoni u integrazzjoni mill-ġdid fis-soċjetà għal persuni li m’għandhomx saqaf fuq rashom speċjalment għal nies li għandhom ‘il fuq minn sittin sena u nies b’diżabilità.

Dan filwaqt li t-tieni proġett bl-isem ta’ ‘Dar Qawsalla’ ddisinjata mil-kumpanija Inguanez Architects ser tara investiment ta’ mija u ħamsin elf ewro biex l-LGBTIQ Rights Movement tkun tista’ toffri housing speċjalizzat għal persuni LGBTIQ bil-għan li jkunu jistgħu jibnu ċ-ċirku soċjali tagħhom, isibu impjieg u jitħarrġu fi programmi edukattivi.

It-tielet proġett huwa dak ta’ ‘Dar Mixtla’ mmexxi mill-Fondazzjoni Sebħ li għalih hemm allokat, mitt elf ewro. Il-kumpanija Atelier Maison se jibni spazju sigur biex jassisti żgħażagħ u nisa flimkien ma’ wliedhom li jkunu għaddew minn episodju ta’ vjolenza domestika biex jibdew jgħixu ħajja indipendenti.

Il-Ministru Roderick Galdes stqarr li programmi ta’ housing speċjalizzati mhux biss huma utli għas-servizzi li joffru imma d-disinn u l-ippjanar li tal-binja ser joffru sostenibbilità u innovazzjoni adattati għas-servizzi speċjalizzati li jagħtu.

Il-Ministru tenna li dawn il-proġetti mhux se joffru sempliċiment ġebel u saqaf imma se jagħtu dar.

Ta’ QabelLi Jmiss

Leave a Reply

Your email address will not be published. Required fields are marked *

Send this to a friend