Notifiki

Malta żżomm dro lill-Islovakkja bi skor ta’ 2-2

Malta żammet l-Islovakkja fi dro ta’ 2-2 f’logħba minn Grupp H mir-rawnd ta kwalifikazzjoni għat-Tazza tad-Dinja.

It-tim Malti ta wirja kbira u qalbiena oħra fejn kien hu li fetaħ vantaġġ ta’ żewġ gowls fi spazju ta’ erba’ minuti fl-ewwel taqsima, fil-logħba li ntlagħbet f’Trnava, fl-Islovakkja.

Fis-16-il minuta Luke Gambin poġġa lil Malta fil-vantaġġ bi ġmiel ta’ gowl b’xutt bid-dawra li spiċċa fir-rokna tax-xibka.

Fl-20 minuta Alexander Satariano skorja t-tieni gowl ta’ Malta b’daqqa ta’ ras wara li ġie żmarkat.

It-tim tal-kowċ Devis Mangia baqa’ jdawwar il-ballun u kellu l-mumenti tiegħu u aktar ċansijiet li jiskorja.

Għall-Islovakkja skurjaw David Strelec u Milan Skriniar fil-bidu tat-tieni taqsima.

L-impenn tat-tim nazzjonali Malti jkompli nhar it-Tlieta li ġej f’logħba diffiċli oħra fil-grupp kontra l-Kroazja.

Malta terġa’ tilgħab barra minn darha.

B’dan id-dro miksub illejla, Malta kisbet l-ewwel punti f’logħba kompetittiva fir-rawnd ta’ kwalifikazzjoni għat-Tazza tad-Dinja f’ erba’ snin.

F’Ottubru tal-2017 Malta kienet kisbet punt f’logħba f’Ta’ Qali kontra l-Litwanja bħala parti mir-rawnd ta’ kwalifikazzjoni għat-Tazza tad-Dinja tal-2018.

Intant fuq Twitter, il-Prim Ministru Robert Abela faħħar il-wirja qalbiena li ta t-tim nazzjonali Malti barra minn daru u nnota wkoll il-progress li qed jagħmel dan it-tim Malti.

Ta’ QabelLi Jmiss

1 Comment

Leave a Reply

Your email address will not be published. Required fields are marked *

Send this to a friend