Notifiki

Ittra tal-PM lill-UE dwar aktar xiri konġunt tal-mediċini tingħata prominenza

Il-Prim Ministru Robert Abela qed jimbotta ‘l quddiem suq wieħed għall-mediċini fost il-pajjiżi kollha tal-Unjoni Ewropea.

Ittra li Dr Abela bagħat fl-aħħar jiem lil President tal-Kunsill Ewropew Charles Michel dwar dan ingħatat prominenza mis-sit awtorevoli Politico fejn intqal kif il-Prim Ministru se jkun qed imexxi ‘l quddiem l-idea ta’ xiri konġunt fuq għadd ta’ mediċini.

Il-Prim Ministru Malti mistenni jressaq ‘il quddiem din il-politika f’laqgħa virtwali oħra tal-Kunsill Ewropew li se ssir il-Ħamis li ġej bejn il-mexxejja Ewropej.

Malta trid li l-Kummissjoni Ewropea tagħmel iżjed fuq ix-xiri konġunt tal-mediċini hekk kif bħalissa kumpanija tal-farmaċewtika tista’ titfa’ f’suq ta’ stat membru partikolari ċertu mediċina iżda ma titfax din l-istess mediċina f’suq ta’ pajjiż ieħor tal-Unjoni Ewropea.

“L-aċċess għall-mediċina m’għandux ikun determinat bil-qawwiet ta’ swieq differenti”, saħaq il-Prim Ministru ta’ pajjiżna li qed juri kemm Malta qed tkun pijuniera li timbotta ‘l quddiem l-prinċipju tas-solidarjetà Ewropea f’kull qasam.

Fil-fatt Malta kienet fost tal-ewwel li mbuttat xiri konġunt tal-vaċċin għall-Covid-19.

Dan wassal li pajjiżi kbar u anki żgħar fl-Unjoni Ewropea waslulhom l-ewwel kunsinji tal-vaċċin fl-istess jiem.

Permezz tal-Prim Ministru tagħha, Malta qed tesiġi li mediċina tkun f’kull stat membru meta kumpanija tal-farmaċewtika titfa’ fis-suq prodott mediċinali.

Ta’ QabelLi Jmiss

Leave a Reply

Your email address will not be published. Required fields are marked *

Send this to a friend