Il-Kummissjoni Elettorali tal-PN tikkundanna l-aġir ta’ Bernard Grech li kellem lill-ġurnalista tal-PBS dwar id-dibattitu – One News

Notifiki

Il-Kummissjoni Elettorali tal-PN tikkundanna l-aġir ta’ Bernard Grech li kellem lill-ġurnalista tal-PBS dwar id-dibattitu

Il-President tal-Kummissjoni Elettorali tal-Partit Nazzjonalista, Peter Fenech ġie rappurtat jikkundanna lill-kamp ta’ Bernard Grech talli l-kamp ta’ Grech kellem lill-ġurnalista tax-xandir nazzjonali Ruth Amaira dwar id-dibattitu ta’ nhar it-Tnejn li ġej bejn iż-żewġ kandidati għat-tmexxija Nazzjonalista.

Is-sitt Illum irrapporta li Fenech ikkonferma li xi ħadd mit-tim ta’ Grech kellem lil Amaira u saħaq li dan ma kellux isir u kellha tkun il-Kummissjoni Elettorali tal-partit li tavża lill-ġurnalista jekk tixtieqx tmexxi d-dibattitu bejn iż-żewġ kontestanti għal Kap tal-Partit Nazzjonalista.

Ilbieraħ il-Kap Nazzjonalista Adrian Delia akkuża lit-tim ta’ Bernard Grech li avviċina ġurnalista tax-xandir nazzjonali sabiex jinfluwenza dibattitu li ser isir bejn iż-żewġ kandidati.

Fi stqarrija uffiċjali, Delia beda billi spjega li t-tim ta’ Bernard Grech irreżista bil-qawwa biex ma jsirx dibattitu fil-kampanja tal-elezzjoni ta’ Kap tal-Partit Nazzjonalista.
Hawnekk Delia fetħilha bil-qawwa kontra l-kandidat ta’ kontrih hekk kif akkuża lit-tim ta’ Bernard Grech li avviċina lil Amaira sabiex jipprova jinfluwenzaha.

Delia kkundanna l-aġir ta’ Bernard Grech, li wassal sabiex il-ġurnalisti ma jitħallewx fil-libertà jwettqu xogħlhom mingħajr indħil.

Intant Bernard Grech ċaħad l-akkużi ta’ Delia u qal li ma kien hemm ebda tip ta’ pressjoni fuq xi ġurnalista.

Madankollu qal li kien hemm kuntatt mil-kamp ta’ Grech ma’ Amaira.

Ilbieraħ ukoll, fi stqarrija, l-istazzjon nazzjonali qal li filwaqt li Ruth Amaira ġie avviċinata biex tmexxi dibattitu hija qatt ma kkonfermat il-parteċipazzjoni tagħha f’dan id-dibattitu.

Ta’ QabelLi Jmiss

Leave a Reply

Your email address will not be published. Required fields are marked *

Send this to a friend