Gli uccelli del malaugurio! – One News

Notifiki

Gli uccelli del malaugurio!

Xi mkien qrajt li l-kuntetizza tiddependi mill-kwalitajiet tal-ħsibijiet tagħna. Jekk naħsbu pożittiv se nħossuna pożittivi. Għall-kuntrarju jekk naħsbu negattiv, allura r-riżultat ikun li ngħixu ħajja miżera u bla sugu.

M’iniex beħsiebni nagħmilha ta’ psikologu għax inkun qed nilbes żarbun li ma jiġinix!

Iżda jekk wieħed isegwi ftit ix-xena politika f’pajjiżna, issib ħafna li fuq il-midja soċjali jew fil-Parlament ipinġu dejjem stampa sewda għall-pajjiż,

Riedu lockdown għax il-pajjiż kollu kien se jimrad. Mingħajr ma jiddikjarawha apertament, kważi jieħdu gost li n-numru ta’ każi ġodda bil-Coronavirus jiżdiedu minflok jonqsu. L-għajnuna li l-Gvern ta lill-ħaddiema sabiex ma jitkeċċewx mix-xogħol fl-aqwa tal-pandemija, ilaqqmuha bħala daħk fil-wiċċ. Jekk il-Gvern jirrilaxxa xi miżuri, jgħidulek li qed ngħaġġlu żżejjed. Jibkulek għax in-nies mhix tixtri minkejja li issa ħafna mill-ħwienet miftuħin. Waqt li l-Gvern u l-pajjiż jifirħu għax l-agħar tal-pandemija għadda bis-sagrifiċċji ta’ ħafna, jaraw li jiggrangfaw ma’ xi kelma barra mill-kuntest sabiex jagħmlu storja biha. Issa li tħabbar li l-ajurport se jiftaħ, igergru għax il-Gvern ma fetaħx biżżejjed u hemm pajjiżi jew reġjuni li ma nistgħux inżuru. Għax irridu mmorru lejn ix-xogħol x’uħud iġibulek l-iskużi sabiex jibqgħu d-dar għax ovvjament iċ-ċekk li tirċievi mingħajr ma tagħmel xejn huwa komdu u lussu fl-istess ħin.

U l-gdiedem u l-kummenti negattivi jimlew il-portals lokali u jħallu dik it-togħma morra ta’ larinġa mħassra.

Filwaqt li l-psikoloġi jgħidulna sabiex inżommu ‘l bogħod minn min huwa negattiv f’ħajtu, jiena nara raġġ ta’ tama fil-messaġġi li jħobbu jibagħtu l-uccelli del malaugurio li għandna ma’ saqajna.

L-argument ta’ dawn it-talin jikkonfermaw fatt li ħadd ma jista’ jinnega.  Li, minkejja d-diffikultajiet li affrontajna, il-pajjiż jinsab fit-triq it-tajba.

L-ewwel nett, għall-kuntrarju ta’ pajjiżi li suppost huma aktar avvanzati minna- bħal pereżempju l-Istati Uniti, ir-Renju Unit, l-Italja, l-awtoritajiet tas-saħħa mxew bi professjonalità liema bħalha f’kull qasam tas-soċjetà tagħna.

Triq li se twasslu jsaħħaħ l-ekonomija mingħajr ma jittraskura saħħtu.

Triq li se twasslu għal aktar suċċessi u opportunitajiet hekk kif darriena- xi drabi bi fsied żejjed- Gvern Laburista f’dawn l-aħħar seba’ snin.

U dawk l-uccelli tal-malaugurio jispiċċaw iduru għalihom infushom għax jintebħu li l-poplu Malti rriġetta n-negattività tagħhom!

Ta’ QabelLi Jmiss
Ray Muscat huwa edukaturi b’esperjenza fl-iskejjel statali Maltin sa mill-1986. Kien għalliem tat-Taljan għal 13-il sena fil-Liċeo Mikiel Anton Vassalli u għal dawn l-aħħar erbatax-il sena huwa amministratur fl-iskola sekondarja fi ħdan il-Kulleġġ San Benedittu. Ray Muscat huwa wkoll kittieb. Kiteb scripts għar-Radju u r-Televiżjoni tal-istat b’xogħolijiet bħal ‘Fil-Kikkra!’, ‘Tlaqna!’ u ‘Oops!’. Sal-lum ippublika żewġ kotba għat-tfal bl-istejjer ta’ Lippu l-Purtinar u ktieb għall-adulti bit-titlu 'Naħqa ta’ Ħmar’. Jinteressah ħafna l-aspett politiku mhux partiġġjan u t-temi soċjali u edukattivi, b’mod speċjali ma’ dawk li sfortunatament jaqgħu lura fil-mixja tal-ħajja.

Leave a Reply

Your email address will not be published. Required fields are marked *

Send this to a friend