Il-PN b’dejn ta’ €34 miljun – One News

Notifiki

Il-PN b’dejn ta’ €34 miljun


ll-Partit Nazzjonalista akkumula dejn ta’ madwar €34 miljun mindu t-tmexxija tal-eks Kap Nazzjonalista Lawrence Gonzi ħalliet il-Partit Nazzjonalista midjun ma’ bosta negozjanti kbar u ma’ diversi banek. 

L-ammont ġie żvelat minn eks uffiċjali tal-Partit Nazzonalista mal-gazzetta MaltaToday.

Bil-kundizzjoni tal-anonimità, wieħed mis-sorsi ġie kwotat jgħid li d-dejn qiegħed jagħmilha diffiċli ħafna biex il-Partit Nazzjonalista jsib nies lesti li jidħlu f’karigi ewlenin fl-amministrazzjoni.

Qal li kull persuna li tidħol għal kariga uffiċjali qed tirriskja li tispiċċa bejn il-basla u qoxritha. Dan f’każ li l-kredituri jiddeċiedu li jagħfsu kontra l-Partit Nazzjonalista. B’mod partikolari spjega li l-liġi tal-finanzjament tal-partiti titfa’ piż kbir fuq it-teżorier tal-partit. Dan għax f’każ ta’ ksur hemm sanzjonijet fuq it-teżorier.

Tliet snin ilu, il-Partit Nazzjonalista baqa’ ma ċaħadx li kellu dejn ta’ €25 miljun. Fil-programm Insights, il-Ħadd li għadda, l-eks Segretajru Ġenerali Clyde Puli kkonferma li l-Partit Nazzjonalista għandu miljuni kbar ta’ ewro f’dejn.

L-eks uffiċjal tal-Partit Nazzjonalista żvela li l-kontijiet ta’ kull xahar li ġew ippreżentati lill-uffiċjali tal-partit juru li matul l-aħħar snin, id-dejn tela’ għal madwar €34 miljun.

Il-gazzetta żiedet tgħid li dan l-ammont ġie kkonfermat minn sors ieħor li m’għadux jimmilita fil-partit iżda huwa informat bis-sitwazzjoni finanzjarja.

Dan l-istess sors żied jiżvela li matul is-sena li għaddiet biss, il-midja nazzjonalista tilfet żewġ miljun ewro u l-paritt ma kienx f’qagħda jwarrab flus biżżejjed biex iħallas iċ-ċedoli.

Iż-żewġ sorsi tefgħu l-ħtija ta’ dan id-dejn fuq l-amministrazzjoni ta’ Gonzi ta’ bejn l-2004 u l-2012 u ż-żewġ segretarji ġenerali li kellu Joe Saliba u Pawlu Borg Olivier.

Huma żied jgħidu l-problema mhix biss id-dejn, iżda wkoll il-programmi ta’ finanzjament li jammontaw għal mijiet ta’ eluf ta’ ewro. Ingħad li fl-aħħar ftit snin dawn tħallsu iżda d-dejn baqa’ għoli u l-isfida l-kbira hi kif se jsibu l-flus biex il-partit jibqa’ għaddej.

L-ex uffiċjali tal-partit żiedu jgħidu li d-dejn li l-Partit Nazzjonalista għandu man-negozjanti l-kbar qiegħed iżommu ostaġġ u din is-sitwazzjoni se tibqa’ tiġri warajh anke jekk ikollu kap ġdid.

Huma kellhom ukoll kliem iebes fil-konfront ta’ għadd ta’ deputati Nazzjonalisti li huma mkabbrin bihom infushom. Nies li fi kliemhom se jibqgħu biċċa wġigħ ta’ ras kbira għal kull Kap li jista’ jiġi wara Delia.

Ta’ QabelLi Jmiss

Leave a Reply

Your email address will not be published. Required fields are marked *

Send this to a friend