Interċettati iktar minn 110,000 oġġett falz – One News

Notifiki

Interċettati iktar minn 110,000 oġġett falz

Id-Dwana kkonkludiet l-investigazzjonijiet tagħha li kienet qed tagħmel fuq erba’ kontejners li ġew interċettati fil-Freeport, fejn irriżulta li kienu qed iġorru eluf ta’ oġġetti foloz. 

Fihom instabu iktar minn 26,000 flixkun fwieħa falza ta’ 9 ditti rinomati, iktar minn 42,000 flixkun shampoo falz ta’ żewġ ditti rinomati u iktar minn 41,000 flixkun vojt ta’ żewġ ditti rinomati tal-fwieħa.

Dawn tal-aħħar kellhom l-intenzjoni ċara li jiġu mimlija bi fwieħa ta’ kwalità inferjuri.

L-ammont totali tal-oġġetti maqbuda kien jaqbeż il-110,000 biċċa.

Il-ħidma saret bejn it-Taqsimiet tal-Propjetà Intelletwali tad-Dwana, il-Container Monitoring Unit u l-Iscanning Team.

L-oġġetti kollha maqbuda rriżulta li huma kollha foloz wara li rappreżentanti legali f’Malta tal-kumpaniji li għandhom id-drittijiet rispettivi u li huma propjetarji tal-marki reġistrati, ikkonfermaw l-illegalità ta’ dawn il-konsenji.

Il-kumpaniji propjetarji tal-marki reġistrati mistennija jippreżentaw rikors fil-Prim Awla tal-Qorti Ċivili kontra l-kumpaniji kontraventriċi f’kull każ.

Ta’ QabelLi Jmiss

Leave a Reply

Your email address will not be published. Required fields are marked *

Send this to a friend