Il-Prim Ministru Joseph Muscat kellu diskussjonijiet mal-Prim Ministru Theresa May dwar il-proċess ta’ Brexit.
Id-diskussjoni li saret permezz ta’ telefonata ffokat fuq it-talba li qiegħed jagħmel ir-Renju Unit għal posponiment ieħor mill-Unjoni Ewropea.
Id-deċiżjoni mistennija tittieħed l-Erbgħa li ġej waqt il-laqgħa tal-mexxejja Ewropej.
Fi tweet il-Prim Ministru Joseph Msucat qal li ddiskuta Brexit ma’ May biex jifhem aħjar it-talba tar-Renju Unit għal posponiment ieħor. Huwa qal li l-implimentazzjoni ta’ koperazzjoni sinċiera se jkun fattur importanti fid-deċiżjoni li se jieħdu l-mexxejja Ewropej.
Il-Prim Ministru kellu wkoll taħditiet mal-Prim Ministru tal-Irlanda dwar il-perspettiva ta’ Brexit qabel il-laqgħa tal-mexxejja Ewropej.
Matul il-jum Theresa May kellha wkoll taħditiet bit-telefon mal-President tal-Kunsill tal-UE Donald Tusk u mal-President tal-Kummissjoni Ewropea Jean-Claude Juncker.
Wara li d-deputati Ingliżi rrifjutaw għal darba, tnejn, tlieta l-ftehim ta’ May għall-Brexit, ix-xahar li għadda, il-mexxejja Ewropej qablu li jipposponu Brexit mid-29 ta’ Marzu għat-12 ta’ April. Waqt summit straordinarju li mistenni jsir l-Erbgħa, May se titlob formalment biex Brexit iseħħ fit-30 ta’ Ġunju.
Il-pajjiżi kollha tal-Unjoni Ewropea jridu jaqblu ma’ din it-talba. Jidher li l-biċċa l-kbira tagħha jinsabu lesti li jilqgħu din it-talba biex jevitaw li r-Renju Unit joħroġ mill-UE bla ftehim bil-konsegwenzi serji li dan jista’ jġib miegħu.
Discussed #Brexit with @theresa_may to better understand UK request for further extension. Implementation of ‘sincere cooperation’ pledge will be an important component of #EUCO decision -JM
— Joseph Muscat (@JosephMuscat_JM) April 8, 2019
Discussed #Ireland perspective on #Brexit with @LeoVaradkar ahead of #EUCO -JM
— Joseph Muscat (@JosephMuscat_JM) April 8, 2019