august moon ball | One News

Notifiki

l-Ifjen platti għall-August Moon Ball

Fil-kċina fejn qed jitħejja l-ikel għall-ballu annwali tal-qamar t’Awwissu, tiddomina l-aroma tal-ifjen u l-aktar ingredjenti friski li se jintużaw għall-ħames platti tas-serata tas-Sibt li ġej.

Il-kok Kevin Bonello preparalna l-ewwel platt, li jinkludi brunġiel, qarabagħli, bżar ikkulurit, ħass u kappar.

Huwa spjega li għall-platti l-oħra, intagħżlu ingredjenti b’kuluri vibranti u frott tal-istaġun.

Il-Kok Kevin Bonello stqarr, “It-tip ta’ Maltin li aħna nħobbu ross u għaġin. Did-darba għandna risotto bil-piżelli u l-ful. Imbagħad għandna l-fillet tal-beef ma’ textures differenti ta’ karotti u patata. Bħala ħelu morna fuq iċ-ċikkulata paired ma’ berries u mango għax il-Maltin inħobbuha ċ-ċikkulata, u nispiċċaw fl-aħħar biċ-chocolate truffles, u tipi oħra ta’ petit four.”

Jikkumplimenta l-ikel, se jkun hemm fost l-ifjen inbid Malti.

L-ispeċjalista tal-inbid Stefan Cassar, spjega li s-serata tibda b’inbid frizzante li huwa ideali għal xarba friska sakemm jibda jitqassam l-ikel, biex imbagħad mal-platti jiġi servut inbid abjad u aħmar.

“Abjad daqsxejn korpuż li jibbilanċja tajjeb mal-ikel imma li fl-istess ħin jibqa’ tajjeb għas-sajf għax is-sħana tagħmel tagħha allura jkollna dejjem dak il-bilanċ u wara ngħaddu għall-inbid aħmar li jmur iktar mal-main course billi għandna l-laħam huwa daqsxejn laħam aħmar iktar b’saħħtu u f’dal-każ għandna bżonn inbid aħmar.” Saħaq Cassar.

Dan il-ballu ilu jsir minn żmien il-Gvernaturi Ingliżi, u l-ħsieb wara l-ġurnata li fiha ssir is-serata huwa li jkun l-aktar Sibt qrib qamar kwinta, biex dak li jkun igawdi d-dawl sabiħ tal-qamar fuq wieħed mill-isbaħ Palazzi fil-gżejjer Maltin.

Iċ-chairman tal-Kumitat Organizzattiv tal-Ballu tal-Qamar t’Awwissu, il-Markeżin Daniel De Petri Testaferrata, qal li l-għażla tal-Verdala tmur paripassu mas-skiet tal-Imdina u l-madwar, u ż-żiffa ħelwa li jkun hemm f’dawn l-inħawi.

Il-Markeżin qalilna, “Is-sbuħija tal-palazz hija ħaġa li tgħaxxqek immensament. Ħaġa li ma tantx naraw Malta, hemm xi tnejn jew tlieta, kemmxejn iżgħar mill-Verdala, imma din hija unika.” 

Huwa qal ukoll li dan ikun l-aħħar avveniment ta’ ċertu eleganza fl-istaġun sajfi.

“L-irġiel jiġu biċ-ċoff, in-nisa bl-ilbies twil, u hija organizzazzjoni li hija avveniment verament eleganti verament ta’ min jipparteċipa fih.” Ikkonkluda De Petri Testaferrata.

Bħal kull sena, l-avveniment se jsir b’riżq il-Fondazzjoni Malta Community Chest Fund.

Imniedi l-Ballu tal-Qamar ta’ Awwissu 2018

L-edizzjoni 2018 tal-Ballu tal-Qamar ta’ Awwissu se ssir nhar l-4 ta’ Awissu li ġej fil-Palazz Verdala.

Dan huwa ballu tradizzjonali li jsir fl-ewwel sibt ta’ Awissu, u li l-flus li jinġabru minnu jmorru kollha għall-Malta Community Chest Fund.

Il-President ta’ Malta Marie Louise Coleiro Preca rringrazzjat lill-organizzaturi tal-impenn li dejjem juru għal dan il-ballu, li kull ma jmur jgħaqqad iktar persuni flimkien.

Il-Biljetti jistgħu jinxtraw mill-Palazz ta’ San Anton jew mill-Palazz tal-President fil-Belt Valletta, kif ukoll mis-sit www.augustmoonball.com

 

Imniedi l-Ballu tal-Qamar t’Awwissu – raġuni doppja

Il-President ta’ Malta nediet l-edizzjoni ta’ din is-sena tal-August Moon Ball, li din is-sena se jsir nhar il-5 t’Awwissu. Il-President Marie Louise Coleiro Preca saħqet fuq l-importanza ta’ dan l-avveniment hekk kif jiftaħ l-istaġun tal-avvenimenti b’risq il-Malta Community Chest Fund.

Hija stqarret li f’dawn l-ewwel sitt xhur tas-sena, l-ispiża tal-mediċina ta’ pazjenti Maltin irdupjat minn dik tas-sena l-oħra u għalhekk l-għajnuna hija importanti iktar minn qatt qabel.

Iċ-chairman tat-tim organizattiv tal-ballu, Daniele de Petri Testaferrata, saħaq kif din is-sena, bħal kull sena oħra se jkun ballu tal-aqwa livell, anke bis-sehem tal-Forzi Armati ta’ Malta, il-korp tal-Pulizija u l-kavalerija tiegħu u l-inguardia parade. Il-mużika tal-ballu se terġa’ tkun f’idejn il-Brass House Unit.

Min jixtieq jattendi jista’ jmur l-uffiċċju tal-Malta Community Chest Fund il-Belt Valletta, iżur il-Palazz ta’ San Anton jew inkella jżur is-sit online tal-August Moon Ball.

Aqra aktar

Il-ballu tal-qamar t’Awwissu se jsir fis-sitt jum tax-xahar

Tnediet edizzjoni oħra tal-ballu tal-qamar t’Awwissu. Dan se jsir is-Sibt 6 t’Awwissu, bl-iskop li d-dħul kollu jmur ghall-Malta Community Chest Fund.

Meta ħabbret dan f’konferenza tal-aħbarijeit, il-President ta’ Malta Marie Louise Coleiro Preca qalet li l-għan tal-Malta Community Chest Fund jibqa’ dak li jkunu salvati l-ħajjiet. F’każijiet oħra jkun żgurat li l-pazjenti u l-qraba tagħhom jkollhom kwalità ta’ ħajja aħjar sakemm iħallu din id-dinja.
Aqra aktar

Send this to a friend