Internazzjonali | One News - Part 23

Notifiki

Trump jibdel fehemtu 10 minuti qabel l-attakk fuq l-Iran

Skont rapporti fil-midja Amerikana, Donald Trump biddel fehemtu wara li l-Ħamis kien diġà approva li jsiru għadd ta’ attakki ta’ ritaljazzjoni militari kontra l-Iran.

Huwa allegat li l-operazzjoni ta’ attakki kienet għadha fil-bidu meta l-President Amerikan biddel fehmtu u waqqaf is-suldati Amerikani milli tipproċedi. Dawn l-attakki kienu se jitwettqu bħala ritaljazzjoni kontra l-Iran meta matul il-jum, l-Iranjani sparaw fuq drone li kien qed jintuża għall-ispjunaġġ mill-Amerikani.

Dan l-inċident seħħ fi żmien fejn it-tensjoni bejn iż-żewġ pajjiżi qed tkompli tikber. Il-President Russu, Vladimir Putin wissa li gwerra bejn l-Istati Uniti u l-Iran tkun katastrofika b’konsegwenzi imprevedibbli.

Mark Field sospiż minn Ministru għall-Affarijiet Barranin Ingliż wara li mbotta attivista

Il-Ministru għall-Affarijiet Barranin Ingliż, Mark Field ġie sospiż wara li nqabad jimbotta b’mod goff attivista dwar it-tibdil fil-klima.

Il-filmati juru lil Field iqum minn fuq is-siġġu jipprova jwaqqaf lill-attivista billi mbottaha waqt li dimostranti oħra xekklu l-bidu tad-diskors annwali tal-Kanċillier Philip Hammon dwar l-ekonomija fir-Renju Unit.

Mark Field iddikjara li rreaġixxa b’dak il-mod għax ħaseb li l-attivista kellha xi arma filwaqt li talabha appoloġija talli mexa magħha b’dak il-mod agressiv.

40 mejta wara li xarabank waqgħet f’wied fl-Indja

Minn tal-inqas 40 ruħ tilfu ħajjithom traġikament u għexieren oħra ndarbu fl-Indja wara li xarabank waqgħet f’wied qalb il-muntanji fl-istat ta’ Himachal Pradesh. Minn tal-inqas 60 passiġġier kienu rekbin xarabank mimlija daqs bajda bin-nies tant li kien hemm xi nies fuq is-saqaf, meta għal xi raġuni tilfet il-kontroll b’konsegwenza li għelbet għal ġo wied fond ta’ 150 metru.

Dawn l-inċidenti mhumiex fula f’qargħa fl-Indja, tant li l-istat ta’ Himachal Pradesh biss irreġistra iktar minn 30,000 inċident fl-aħħar għaxar snin. Skont it-Times tal-Indja aktar minn 11,000 ruħ inqatlu u madwar 54 elf oħra indarbu matul dawn is-snin.

Erba’ rġiel se jkunu mixlija bi qtil b’rabta mat-tiġrif tat-titjira MH17 fuq l-Ukrajna

Erba’ rġiel qed jinżammu fil-kustodja tal-Awtoritajiet Olandiżi u mistennija jitressqu l-Qorti mixlija bi qtil b’rabta mal-attakk li sar fuq it-titjira MH17 ta’ Malaysia Airlines f’Lulju tal-2014.

L-investigaturi Olandiżi li qed imexxu l-każ se jixlu lil Igor Girkin, Serget Dubinskjy u Oleg Pulatov mir-Russja, kif ukoll lil Leonid Khachenko mill-Ukrajna, li sparaw fuq l-ajruplan tal-għamla Boeing meta kien fi triqtu minn Amsterdam għal Kuala Lumpur. Huma qed jinżammu mill-Awtoritajiet wara li nħareġ mandat internazzjonali ta’ arrest fil-konfront tagħhom.Aqra aktar

Trump iniedi l-kampanja tiegħu għall-Elezzjoni Presidenzjali tal-2020

Il-President Amerikan Donald Trump nieda b’mod uffiċċjali l-kampanja elettorali tiegħu għall-Presidenza tal-Istati Uniti bit-tema ‘keep this team in place’.

Huwa nieda l-kampanja tiegħu waqt rally fl-Istat Amerikan ta’ Florida, li għaliha attendew eluf ta’ partitarji Repubblikani. Hawnhekk huwa nfexx f’attakki kontra l-avversarju Demokratiċi tiegħu, li saħansitra akkużahom li pruvaw jiżirgħu il-firda fil-pajjiż.

“Inwegħdkom li mhu se niddiżappuntakom qatt”, qal Donald Trump, li f’eku tal-kampanja tiegħu għall-elezzjoni tal-2016, reġa’ wiegħed lill-elettorat li se jibqa’ jittrasforma l-Amerika f’pajjiż aħjar.

70 miljun persuna ħarbu l-gwerer u l-kunflitti fl-2018- il-UNHCR

In-numru ta’ persuni li qed jaħarbu l-gwerer u l-kunflitt qabeż is-70 miljun fl-2018, l-ogħla rata li qatt kienet innotata mill-Aġenzija tar-Refuġjati tal-Ġnus Magħquda, il-UNHCR, f’sebgħin sena ta’ operat.

Fi stqarrija l-Aġenzija spjegat li bejn l-2017 u l-2018 dan in-numru żdied b’2.3 miljun persuna, u qabeż id-doppju tan-numru ta’ refuġjati nnotat 20 sena ilu. Il-UNHCR qed tikkalkula li ta’ kuljum, minn tal-anqas 37,000 persuna jaħarbu minn djarhom bit-tama li jsibu futur aħjar.

Kelliem għall-Aġenzija qal li għalkemm ġieli affaċċjaw kritika għal xogħlhom, eluf ta’ persuni madwar id-dinja qed juru solidarjetà ma’ dawn il-persuni, hekk kif innota wkoll żieda fl-ammont ta’ familji li jagħżlu li joffru post sigur fejn jgħixu r-refuġjati.

Send this to a friend