Trischia Falzon – Page 63 – One News

Trischia Falzon

Notifiki

Attakk terroristiku fi New York

Tmien persuni tilfu ħajjithom u ħdax oħra ndarbu serjament fi New York wara li spiċċaw vittmi t’attakk terroristiku.

Ħamsa mill-mejta kienu ħbieb mill-Arġentina li flimkien ma’ grupp ta’ ħames persuni oħra kienu fi New York biex jiċċelebraw it-tletin anniversarju minn meta ggradwaw.

L-attakk seħħ f’Manhattan, meta raġel saq f’karreġġjata taċ-ċiklisti, u qabad jispara fl-istess waqt li jsuq bi trakk fuq dawk li kienu qed isuqu r-rota u oħrajn li kienu għaddejjin mill-inħawi.Aqra aktar

“Kont qtajt qalbi li ngħix, sakemm ma l-Bambin bagħatli lil Drew” – mara li ġġorr qalb żagħżugħ t’20 sena

“Kiefra wisq meta tiltaqa’ mal-mewt. Kont qtajt qalbi li ngħix, sakemm ma l-Bambin bagħatli lil Andrew”.

Din hija l-istorja ta’ Christine Grixti. Mara li ngħatat il-ħajja mill-ġdid grazzi għal qalb żagħżugħ, li għalkemm miet, għadu qed jgħix ġewwa fiha.

Christine ħaditna lura fiż-żmien meta kellha biss tmintax-il sena, u mit-testijiet li sarulha irriżulta li kellha virus f’muskolu tal-qalb, li jkabbar l-organu bi tliet darbiet.

Viżibbilment emozzjonata, qalet li ħajjitha nbidlet mil-lejl għan-nhar, hekk kif kellha twaqqaf kull attività li b’xi mod jew ieħor setgħet tikkawżalha l-istress.

Sadanittant, għamlulha Implantable Cardioverter Defibrillator – ICD; biex iżżommha ħajja, ħalli f’każ li qalbha ma tibqax tħabbat, tingħata x-xokkijiet. Kif eventwalment ġara.

Aqra aktar

Pulse rebħet l-elezzjoni fl-ITS

B’92% tal-voti miksuba, l-għaqda studenteska Pulse rebħet l-ewwel elezzjoni li saret fl-Istitut tal-Istudji Turistiċi.

Kienu ħamsa l-kandidati li rrappreżentaw lill-Pulse.

F’din l-elezzjoni, 121 voti marru għall-Pulse, 11 għall-SDM, u 6 kienu invalidi.

 

Intlaħqet il-mira t’10,000 Malti donatur tal-organi xahrejn qabel

L-Armata rrispondiet bi ħġarha għal inizjattiva li rat numru ta’ suldati jirreġistraw biex ikunu donaturi tal-organi.

Biex bil-firem li nġabru u kienu ppreżentati fil-Ministeru tas-Saħħa fil-bidu ta’ ġimgħa ġdida, intlaħqet il-mira li sal-aħħar ta’ din is-sena jkunu minn tal-inqas għaxart’elef, dawk li jirreġistraw bħala donaturi tal-organi.

Wara li din is-sena saru tletin trapjant – numru rekord; issa hemm mija u għaxra li qed jistennew organu, bil-għan li dawn il-pazjenti wkoll jingħataw ħajja ġdida.Aqra aktar

Jittella’ katavru fil-bajja tal-Armier

Daniż ta’ 73 sena ttella’ mill-baħar mejjet wara li sab diffikultà waqt li kien qed jogħdos.

Jidher li l-anzjan kien ma’ tim ta’ bugħaddasa li kienu qed jgħoddsu fix-Xatt l-Aħmar f’Għajnsielem Għawdex, u għal xi raġuni mhux magħrufa ma baqax mal-grupp u tela’ fil-wiċċ.

Dan seħħ għall-ħabta ta’ nofsinhar, u dlonk bdiet tfittxija minn tim ta’ bugħaddasa u dgħajsa tal-Forzi Armati ta’ Malta.

Kien għall-ħabta tas-sitta tal-lejla li l-Pulizija daħlulha rapporti li ntlemaħ katavru fin-naħa tal-bajja tal-Armier.

Wara li marru fuq il-post, il-Pulizija kkonfermaw li l-katavru kien tal-istess persuna li kienet irrapurtata nieqsa aktar kmieni f’Għawdex, u kien kawża tar-riħ qawwi li hawn fil-gżejjer Maltin bħalissa li l-katavru inġarr mal-mewġ u minn Għawdex spiċċa l-Armier.

Dwar il-każ infetħet inkjesta Maġisterjali mmexxija minn Paul Coppini, li ħatar diversi esperti biex jassistuh.

“Ħfirtlu għax ma ridtx li familtu tbati miegħu” – Omm Gabriel

L-għada li ħarġet l-aħbar li l-Qorti tal-Appell irrevokat sentenza’ ta’ tletin xahar ħabs għal raġel li nstab ħati għall-qtil involontarju ta’ tifel ta’ tliet snin wara li l-ġenituri taċ-ċkejken ħafrulu, one.com.mt tkellem m’ommu Vanessa Agius.

Meta kkuntattjatha minn ONE News, omm iċ-ċkejken Gabriel Agius qaltilna li, li kieku Francis Mamo mar il-ħabs, kienet tbati miegħu l-familja kollha.Aqra aktar

“NINGĦAQDU BIEX NGĦIDU L-VERITÀ” – JOSEPH MUSCAT

F’intervista fuq ONE Radio Joseph Muscat tkellem dwar il-ħtieġa li l-poplu jkun magħqud. Mhux biex ma jkunx hemm il-kritika, iżda biex wieħed jagħraf jgħid il-verità. Meta kien qed jitkellem dwar il-qtil ta’ Daphne Caruana Galizia li seħħ nhar it-Tnejn li għadda, il-Prim Ministru tenna l-impenn tal-gvern li ssir ġustizzja.Aqra aktar

Katalunja ma taċċettax il-pjan tal-Gvern Spanjol

Il-Mexxej tal-Katalunja qal li mhux se jaċċetta l-pjan tal-Gvern ċentrali Spanjol biex jieħu tmexxija tar-reġjun f’idejh.

Huwa qal li dan huwa l-agħar attakk fuq l-istituzzjonijiet tal-Katalunja mid-dittatorjat tal-General Franco bejn l-1939 u l-1975 – meta l-awtonomija tar-reġjun kienet spiċċat għal kollox.

Il-pjan tal-Prim Ministru Spanjol Mariano Rajoy jinkludi t-tneħħija tal-Mexxej tal-Katalunja u t-trażżin tal-poteri tal-Parlament tar-reġjun.

Il-Mexxej tal-Katalunja qal li l-Gvern ċentrali qed imur kontra d-demokrazija. Għaldaqstant se jressaq dil-kwistjoni quddiem il-Parlament tar-reġjun biex issir diskussjoni dwar il-pjan tal-Gvern ċentrali u tittieħed deċiżjoni b’risposta għal dan l-istess pjan.

Jingħaqdu flimkien għal għan nobbli

Ħames eks-Presidenti Amerikani attendew kunċert għal għan nobbli flimkien biex jinġabru flus għall-vittmi tal-uragani li ħakmu lill-Istati Uniti din is-sena.

Barack Obama, George W Bush, Bill Clinton, George HW Bush u Jimmy Carter marru f’Texas biex ikomplu jwasslu l-messaġġ t’appell għall-għajnuna lill-vittmi.

It-tliet Demokratiċi u ż-żewġ Repubblikani ngħaqdu flimkien biex jgħinu speċjalment lil dawk affetwati mid-diżastri li ħallew l-uragani Harvey, Irma u Maria.

Mill-kunċert inġabru 31 miljun dollaru Amerikan.

BIL-FILMAT: ĦRUQ TA’ KAROZZA F’TAL-PIETÀ

Il-Pulizija kkonfermaw ma’ ONE News li ftit kmieni dalgħodu seħħ inħarqet karozza f’Tal-Pietà. Il-każ seħħ għall-ħabta tas-06:30 fi Triq id-Duluri fi Pjazza Madonna ta’ Fatima. Fuq il-post waslu membri mid-Dipartiment tal-Protezzjoni Ċivili sabiex jikkontrollaw in-nirien.

Il-karozza li nħarqet hija tat-tip Volkswagen Golf u kawża tal-ħruq din inqerdet għal kollox. Karozza tat-tip Mazda li kienet ipparkjata viċin ġarrbet ħsarat estensivi.  Żewġ garaxxijiet li kienu jinsabu ħdejn il-karozza pparkjata ġarrbu xi ħsarat fil-bibien imma sorsi fuq il-post tal-inċident qalu lil one.com.mt li l-kontenut ta’ ġewwa ma ġarrab l-ebda ħsara.

Fuq il-post issejħu membri mit-Taqsima Forensika tal-Korp tal-Pulizija u dwar il-każ inħatret inkjesta  mmexxija mill-Maġistrat tal-għassa Natasha G. Sciberras.

 

 

Send this to a friend