Erba’ snin ħabs għall-missier li qabbad karozza f’Ħaż-Żabbar – One News

Notifiki

Erba’ snin ħabs għall-missier li qabbad karozza f’Ħaż-Żabbar

Feliċ Delia ta’ 45 sena magħruf bħala Tal-Lantas u li joqgħod Wied il-Għajn ġie kkundannat 4 snin ħabs, wara li flimkien maż-żewġ uliedu, ammetta li ta n-nar karozza li kienet ipparkajata quddiem kantina f’Ħaż-Żabbar u li fiha jżomm diversi annimali.

Il-każ seħħ il-Ħadd fl-3:45 ta’ waranofsinhar, meta Delia intlemaħ jitfa’ likwidu li jaqbad madwar karozza ta’ koppja li kienet ipparkjata fi Triq id-Dejqa f’Ħaż-Żabbar. Miegħu kien hemm ibnu ta’ 17-il sena li ismu ma jistax jissemma’ u Stephen Fava ta’ 18-il sena.

Minkejja li ppruvaw jitkellmu miegħu bil-kelma t-tajba, ir-raġel ta n-nar lill-karozza li bħal leħħa ta’ berqa saret fjamma waħda.

In-nirien intfew minn membri tal-Protezzjoni Ċivili li ssejħu fuq il-post.

L-Ispettur Eman Hayman ressaq lil missier u ż-żewġ uliedu l-qorti u xliehom taw in-nar karozza tal-għamla Kia Picanto, li għamlu ħsara fuq il-ħwejjeġ ta’ ħaddiehor u kisru l-paċi pubblika.

Feliċ Delia ġie akkużat ukoll li pprova jweġġa’ żewġ persuni wara li xeħtilhom il-fjuwil fuqhom, filwaqt li kkaġuna ferita ta’ natura ħafifa fuq mara li hija waħda mill-vittmi f’dan il-każ. Dan meta marret biex tipprova tressaq il-karozza anke jekk kellha kull dritt tħalliha pparkjatha fejn kienet. Iżda kien kollu għalxejn.

Il-Maġistrat Simone Grech ikkundannat lil Feliċ erba’ snin ħabs u sentejn ħabs sospiżi għal erba’ snin fil-konfront taż-żewġ uliedu li qalu li għandhom sengħa.

Il-Prosekuzzjoni qalet li l-ħsara li saret wara li nħarqet il-karozza kienet tammonta għal €4,000. Il-ħatja ġew ordnati jħallsu dawn l-ispejjeż.

Il-Maġistrat Simone Grech ħarġet ordni ta’ protezzjoni għal tliet snin fil-konfront tal-vittmi.

Ta’ QabelLi Jmiss

Leave a Reply

Your email address will not be published. Required fields are marked *

Send this to a friend