Kulħadd irid jitgħallem il-Malti – One News

Notifiki

Kulħadd irid jitgħallem il-Malti

Kull persuna li tattendi skola f’Malta u ssegwi l-kurrikulu nazzjonali trid titgħallem il-Malti.

Din hija stqarrija importanti hekk kif tnediet il-politika nazzjonali tat-tagħlim tal-Malti bħala lingwa barranija.

Din il-politika hija miftuħa għall-konsultazzjoni u qed jiġi propost li kull persuna f’Malta jkollha ħiliet differenti fil-lingwa Maltija.

Il-Malti mgħallem bħala lingwa barranija li qed ikun deskritt bħala MLB mistenni jara li tfal migranti u dawk li għandhom ġenitur wieħed b’karta tal-identita mhux Maltija jitgħallmu l-Malti bħala lingwa barranija.

“Għandhom jiġu stabbiliti proċeduri għar-reġistrazzjoni tat-tfal għall-MLB”, tisħaq din il-politika nazzjonali miftuħa għall-konsultazzjoni.

Waqt it-tnedija l-Ministru għall-Edukazzjoni Evarist Bartolo saħaq li huwa importanti li anki l-barranin f’Malta jitgħallmu l-Malti.

“Min jiġi jaħdem hawn għandu jkun jaf jitħaddet bil-Malti”, saħaq Evarist Bartolo.

Min-naħa tiegħu s-Segretarju Permanenti Frank Fabri spjega kif sa issa ‘l bibien huma magħluqa għal min hu barrani u jixtieq jitgħallem il-Malti meta jitfaċċa fl-iskejjel tagħna f’eta mhux bikrija.

Intqal li l-għalliema tal-Malti għandhom ikollhom tħejjija meħtieġa biex jgħallmu l-MLB bħala suġġett.

Id-dokument dwar il-politika nazzjonali għat-tagħlim tal-Malti bħala lingwa barranija jitkellem ukoll dwar perjodu tranżitorju ta’ tħejjija għall-istudenti migranti li ma jkunux jafu la bil-Malti u lanqas bl-Ingliż.

Il-konsultazzjoni hija miftuħa sal-aħħar t’Ottubru.

Ta’ QabelLi Jmiss

Send this to a friend