Il-PM jemfasizza l-koperazzjoni f’diversi oqsma bejn Malta u l-Lussimburgu – One News

Il-PM jemfasizza l-koperazzjoni f’diversi oqsma bejn Malta u l-Lussimburgu

Waqt laqgħa bejn il-Prim Ministru Joseph Muscat u l-Prim Ministru tal-Lussimburgu Xavier Bettel ġiet diskussa l-ħidma konġunta bejn iż-żewġ pajjiżi li, minkejja differenzi ġeografiċi, għandhom ideat u interessi simili f’diversi setturi.

Ewlenin fosthom il-migrazzjoni fejn Dr Muscat esprima l-apprezzament tiegħu għall-attitudni realistika li jħaddan il-Lussimburgu, wieħed mill-pajjiżi li dejjem għen fil-ftehimiet ad hoc li kkordinat Malta biex ikunu indirizzati sitwazzjonijiet delikati fil-Mediterran.

Qasam ieħor li jgħaqqad liż-żewġ pajjiżi hija l-industrija tas-servizzi finanzjarji. Dr Muscat qal li l-pressjoni kontra l-unanimita fil-qasam tat-tassazjoni se tiżdied u Malta u l-Lussimburgu ma jistgħux jidhru bħala l-front tal-le, iżda bħala żewġ pajjiżi li għandhom is-soluzzjonijiet.

Il-Prim Ministru tal-Lussimburgu Xavier Bettel ikkonferma li bejn iż-żewġ pajjiżi jeżistu relazzjonijiet b’saħħithom. Saħaq li minkejja li huma kompetituri, fil-qasam tas-servizzi finanzjarji, Malta u l-Lussimburgu huma attivi ħafna u se jibqgħu jimbuttaw pożizzjoni komuni kontra l-armoniżazzjoni fid-diskussjonijiet Ewropej.

Dwar il-migrazzjoni Bettel qal li, waqt li l-Lussimburgu se tibqa tgħin meta jkun hemm bżonn, l-Unjoni Ewropea trid issib soluzzjoni permanenti.

Bettel awgura lil Malta għar-riżultati ekonomiċi u soċjali mill-aqwa li qed tikseb b’mod regolari. Qal li b’mod simili għat-tmexxija tiegħu fil-Lussimburgu, wara 6 snin fit-tmexxija, Dr Muscat irnexxilu jbiddel lil Malta minn pajjiż tradizzjonali għal wieħed modern.

Għaż-żjara fil-Lussimburgu, l-ewwel waħda ta’ Prim Ministru Malti fi 15-il sena, il-Prim Ministru qed ikun akkumpanjat mill-Ministru għall-Affarijiet Ewropej u l-Ugwaljanza Helena Dalli.

Ta’ QabelLi Jmiss

Leave a Reply

Your email address will not be published. Required fields are marked *

Send this to a friend