Filmat: L-istorja wara l-X-Ray li kapaċi ssalvalek ħajtek – One News

Notifiki

Filmat: L-istorja wara l-X-Ray li kapaċi ssalvalek ħajtek

Matul is-sena li għaddiet, fl-Isptar Mater Dei saru aktar minn 170,000 x-ray.

Il-maġġoranza tagħhom, kważi 80,000, saru fid-Dipartiment tal-Emerġenza, filwaqt li aktar minn 34,000 kienu CT Scans.

 

Intant, dawn kienu uħud mit-testijiet li saru fuq il-pazjenti fl-Isptar Mater Dei:

MAMMOGRAMS         3,537

ANGIOGRAMS             3,788

PET CT                           4,793

CT SCAN                       34,450

X-RAYS                          47,126

A&E X-RAYS                 78,424

Fil-jum li timmarka l-123 sena mindu ġiet skoperta l-magna tal-x-ray, tkellimna ma’ Ray Spiteri, li jmexxi d-Dipartiment tal-Medical Imaging fl-Isptar Mater Dei.

Ħadna lura għas-seklu 19, meta fiżiċista Ġermaniż kien qed jesperimenta fuq ir-raġġi u tant kemm ma kienx jaf x’inhuma li smemihom raġġi X.

Illum, aktar minn 120 sena wara, ġew żviluppati magni li bihom it-tabib jista’ jara lill-pazjent minn barra u minn ġewwa.

Is-Sur Spiteri spjega li hemm diversi magni ta’ x-rays, kollha jagħtu spjegazzjoni aktar dettaljata tal-patoloġija tal-pazjent:

“Il-pazjent ġeneralment ikun qed iħoss xi ħaġa, jista’ jkun uġigħ u jista’ jkun le, imur għand it-tabib tiegħu li jeżaminah u jibagħtu għandna għall-X-Ray. Jiġi għall-X-Ray, it-tabib tagħna jeħodlu X-Ray, jagħti r-riżultat u minn hemmhekk ikompli t-trattament”.

Riżultat ta’ x-ray jista’ juri affarijiet bħall-kundizzjonijiet ta’ mard u ksur; iżda f’ċertu każi affarijiet ferm aktar serji.

Spjega x’jiġri f’każ meta pazjent li jkun involut f’inċident tat-traffiku, jidħol l-Emerġenza:

“It-tabib jordnalu CT Scan, jinżel fid-Dipartiment tagħna, nagħmlu CT Scan, u wara t-tabib tal-X-Ray jagħti r-riżultat. Ikun hemm is-surgeon lest jistenna dak ir-riżultat, jara jkunx hemm xi bleeding, jitla mal-ewwel it-theatre l-pazjent u jiġi operat minnufih”.

Is-Sur Spiteri nnota li mija u għoxrin sena ilu, x-ray ta’ parti żgħira mill-ġisem kien jittieħed b’tubu u kien jieħu 20 minuta, iżda llum l-x-rays saru mezz indispensabbli għat-tobba biex ikunu jistgħu jikkuraw lill-pazjenti tagħhom:

 

“Jien niftakar fil-passat li biex tagħmel brain scan kien idum 20 minuta, illum anqas minn għaxar sekondi. Biex tagħmel whole body scan, jiġifieri thorax, abdomen u pelvis, 30 sekonda”.

Biex f’120 sena mindu ġiet skoperta magna li biddlet għalkollox il-wiċċ tad-dinja medika, saru żviluppi b’tali mod li huma ta’ benefiċċju mhux biss għall-pazjent, li sar ibati ferm inqas, iżda wkoll għall-professjonisti.

Ta’ QabelLi Jmiss

Leave a Reply

Your email address will not be published. Required fields are marked *

Send this to a friend