"Busuttil għandu jitlaq għax kien lest ikisser pajjiż fuq gidba" | One News

Notifiki

“Busuttil għandu jitlaq għax kien lest ikisser pajjiż fuq gidba”

Raġuni oħra għaliex Simon Busuttil għandu jirriżenja minn kull kariga li għandu hi dik li kien lest jimmina l-interess nazzjonali fuq gidba.

Tkellmu dwar dan, is-Segretarji Parlamentari Aaron Farrugia u Silvio Schembri f’konferenza tal-aħbarijiet li matulha fakkru f’azzjonijiet li ħadu Simon Busuttil u l-Partit Nazzjonalista fl-ewwel xhur tas-sena li għaddiet.

Is-Segretarju Parlamentari Farrugia fakkar kif il-qofol tal-frame up politiku bbażat fuq dokumenti b’firem foloz seħħ fi żmien li Malta kellha l-Presidenza tal-Unjoni Ewropea. Spjega kif riedu li Malta tidher ikrah f’mument fejn għajnejn l-Ewropa kienet fuqna. “Il-Presidenza tal-Unjoni Ewropea kienet suċċess minkejja l-attakk ta’ Simon Busuttil,” qal Farrugia li fisser kif il-fatt li l-poplu Malti qam għall-okkażjoni ma jneħħi xejn mill-ħsara li prova jagħmel l-eks Kap tal-Oppożizzjoni. Spjega kif fetħu attakk fuq il-Prim Ministru u familtu għax kien qed jagħmel biċċa xogħol tajba mal-istituzzjonijiet Ewropej.

L-istess provaw jimminaw is-servizzi finanzjarji li joħolqu tant impjiegi u opportunitajiet. Silvio Schembri rrefera għal-laqgħat li saru ma’ ħaddiema u investituri jipprovaw jbeżżugħhom li minħabba dak li kien qed jiġri l-operaturi f’dawn is-servizzi kienu se jitilqu ‘l barra. “U dan kollu fuq gidba. Dan kollu fuq dokumenti foloz,” qal Schembri. Is-Segretarju Parlamentari tenna li l-pajjiż baqa’ miexi ‘l quddiem minkejja Simon Busuttil, grazzi għall-bżulija tal-gvern u l-poplu tiegħu. Minkejja dan kienu l-poplu emmen lil Simon Busuttil illum pajjiżna kien jiffaċja elezzjoni għax kien ikun skopert li rebaħ elezzjoni fuq gidba.

Silvio Schembri qal li l-Kap tal-Oppożizzjoni Adrian Delia jaf sew x’inhu l-pass li għandu jieħu u l-ebda skuża ma tkun valida biex imur pass lura minn dak li qal li se jagħmel. Għax, post Simon Busuttil, m’għadux fil-politika.

Ta’ QabelLi Jmiss

Send this to a friend