Jonqsu b'iktar minn tliet mija l-kawżi pendenti f'Għawdex | One News

Notifiki

Jonqsu b’iktar minn tliet mija l-kawżi pendenti f’Għawdex

Il-kawżi pendenti fil-Qorti t’Għawdex naqsu b’iktar minn tliet mija.

Dan meta wieħed iqabbel l-aħħar tas-sena elfejn u tnax, mal-aħħar ta’ Jannar li għadda.

Dettalji mogħtija fil-Parlament juru kif dan it-tnaqqis jirrifletti l-iżjed fil-Qrati Kriminali, fejn il-kawżi naqsu b’iktar min-nofs.

Fil-fatt filwaqt li fi tmiem l-aħħar sena ta’ Gvern Nazzjonalista il-kawżi pendenti kienu jlaħħqu l-ħames mija u sbatax, fl-aħħar ta’ Jannar dawn niżlu għal mitejn u tnejn u erbgħin. Tnaqqis ta’ mitejn u ħamsa u sebgħin każ.

DIĊEMBRU 2012 JANNAR 2018 DIFFERENZA
517 242 -275

Minn naħa l-oħra, fil-Qrati Ċivili il-kawżi niżlu minn ħames mija u ħamsin għal ħames mija u ħdax.

Tnaqqis ta’ disa’ u tletin kawża.

DIĊEMBRU 2012 JANNAR 2018 DIFFERENZA
550 511 -39

Fit-tweġiba tiegħu fil-Parlament, fejn ta’ dawn id-dettalji, il-Ministru għall-Ġustizzja Owen Bonnici spjega kif dawn id-dettalji jikkonfermaw l-impenn tal-Gvern li jkompli jnaqqas il-kawżi pendenti fil-Qrati Lokali sabiex jibbenefikaw iċ-ċittadini.

Għaldaqstant filwaqt li hemm lok għal titjib, il-Ministru Bonnici tenna li dawn ir-riżultati jagħtu iktar enerġija lill-Gvern biex ikompli bir-ritmu ta’ riformi biex il-proċessi ġudizzjarji jsiru iktar spediti.

Ta’ QabelLi Jmiss

Send this to a friend