Malta tiffirma ftehim dwar il-viżi mal-Polonja | One News

Notifiki

Malta tiffirma ftehim dwar il-viżi mal-Polonja

Malta u l-Polonja ffirmaw ftehim ta’ rappreżentanza reċiproka fil-ħruġ tal-viżi. Iċ-ċerimonja tal-iffirmar saret fil-Ministeru tal-Affarijiet Barranin tal-Polonja f’Varsavja, u daħal fis-seħħ fl-istess jum. Malta kienet irrappreżentata mill-Ministru għall-Affarijiet Barranin u Promozzjoni tal-Kummerċ Carmelo Abela, akkumpanjat mill-Ambaxxatriċi residenti ta’ Malta għall-Polonja Natasha Meli-Daudey, u l-Polonja mill-Ministru għall-Affarijiet Barranin,Witold Waszczykowski.

 

Il-Ministru Abela ħabbar li l-ewwel post fejn il-Polonja se tibda tirrappreżenta lil Malta se jkun il-kapitali Iranjana, Tehran. Irrimarka li dan huwa pass importanti fir-relazzjonijiet bejn iż-żewġ pajjiżi, li se jagħti spinta għall-kooperazzjoni bilaterali.

 

Ġew diskussi ukoll temi t’interess reċiproku bħat-tisħiħ tar-relazzjonijiet kummerċjali f’għadd ta’ setturi, s-sigurtà Ewropea, il-migrazzjoni, il-viċinat tal-Unjoni Ewropea, kif ukoll Brexit u l-ġejjieni tal-Ewropa.

Ta’ QabelLi Jmiss

Send this to a friend