Il-kowċ tat-tim nazzjonali Malti Pietro Ghedin qal li l-logħba hija 90 minuta u mhux taqsima u għalhekk filwaqt li kien kuntent ħafna bil-wirja tat-tim fl-ewwel nofs tal-logħba, ma setax jgħid l-istess għat-tieni nofs. Ghedin kien qed jitkellem dwar il-logħba kontra l-Iskozja li l-Maltin tilfu bl-iskor ta’ 5-1.
Il-kowċ ma naqasx milli jirrimarka dak li qalu kważi dawk kollha li segwew il-logħba, li d-deċiżjonijiet tar-referee kienu ħafna drabi żbaljati, inkluż il-penalty li bidel il-logħba.
Però logħba bħal din hija realizazzjoni kemm it-tim Malti fadallu iktar x’jaqdef.
“Ħejjejna tajjeb għal din il-partita iżda meta taħseb li tkun qiegħed tajjeb u kif suppost, tirrealizza li jkun għad jonqsok ħafna aktar. M’hemmx dubju li l-Iskoċċiżi kienu l-aħjar tim u agħar minn hekk, hu tim li jibqa’ ġej sal-aħħar anki meta kien jaf li kien żewġ gowls minn fuq u bi plejer u tnejn aktar,” qal Ghedin.
Il-logħba li jmiss issa hija ikbar u iktar diffiċli. F’Wembley t-tim nazzjonali Malti se jilgħab kontra l-Ingliżi. Malta se tkun mingħajr Luke Gambin u Jonathan Caruana li tkeċċew – tkeċċijiet li wkoll ħolqu ċerti dubji.
Intant, il-kowċ tal-Iskozja Gordon Strachan qal li hu kuntent bis-saħħa mentali li wrew il-plejers.